حصريا اتمنى التثبيت

[دوووم رايقه]

هذي قصه حصريا ما انتشرت بمنتدى قبل هالمنتدى وقلت اول منتدى تنتشر فيه صدى الاشواق واتمنى تنشرونها اذا كنتوا مشتركين بمنتديات ثانيه بليييييييييييييز
واليكم القصه
----------------------------------------
مـــــــــــــــــــــــا تــــــــهـــــــنــــــــيـــــــــت فــــــــــــــــــــــيـــــــــه

الجزء الأول:
اسمي حنان بنت كأي بنت عادية، شاطرة..حبوبة..أحب أهلي ويحبوني وعمري الحين 25 سنة وسالفتي عن قبل 7سنين يعني كان عمري وقتها 18 سنة برابعة ثنوي، كان لي رفيجة أموت فيها بشكل مو طبيعي تقدرون تقولون مثل أختي أو أكثر، اهي تقريبا جيراننا يمنا.....وكل يوم الصبح بالمدرسة نروح بالباص، اهي كل يوم تسولفي عن أخوها وتمدحه لي مدري شسالفتها كانها تقول اخذيه لج!! المهم أنا حبيت أفتك عن الفضايح ومثل ماتعرفون اهم جيراننا وماحبيت أسوي مشاكل بين أهلي وبينهم، بيوم من الأيام ولم كنا بالمدرسة قاعدين بالهدة ننطر الباص مادرينا الا ان مدرسة قالت ان الباص مبنشر عليهم ووفروا تلفون على ان كل طالبة تدق على أهلها يوصلونها للبيت أنا دقيت وطلع ابوي بالدوام وأمي ماتسوق يعني انسوا أحد يمرني، فكرت بطريقه ما لقيت الا رفيجتي مشاعل فقربت منها وقلت
"مشاعل مستحية منج بس أبطلبج.."
"حنان آمري وليش تستحين أفا ما توقعتج جذيه؟؟"
" أنا أبوي بالدوام وماعندي أحد يجيني ممكن لاهنتي تقطوني على بيتنا بطريجكم؟"
"وبس؟؟ على هذا مستحية أقول لا تخليني اكفخج تعالي الحين السايق جاي"
قلت لها وانا مستانسة ومتفشلة بنفس الوقت "مشكورة يبعد عمري"
وخذتنا السوالف ولين جا السايق خذيت جنطتني الله يذكرها بالخير ام ورود حمرة واهي نفس الحكاية وركبنا السيارة، وعاد مشاعل كانت ونعم المراهقة كل ماشافت صبي تتحطم الاخت وشافت واحد راكب الرنج يسوق وكان كاشخ وعبالها شكلنا حلو بلبس المدرسة فقالت للسايق:
"راجو فج الدريشة ورا حر وبطل الاف ام "
وقالتلي
"حنان تكفين حجابي زين"
"صج فاضية الله يهديج "
"الله لاتبلانا حدج مؤدبة أقول عيشي سنج"
الولد شاف شكلها وقرر يلحقنا هني أنا مت خوف خفت يشوفه اخوي ويعصب وحنا رادين...المهم الولد لحقنا لين مل وراح واول ما وصلنا كان اخو مشاعل عامر طالع من بيتهم الصراحة كان شكله حلو مو طبيعي ازقرت وعجيب وقبل مايركب السيارة قعد يطالعني بنظرة غريبة لدرجة اني استحيت ونزلت راسي، والولد لم الحين يطالع؟؟ وانا الحين شيفكني منه؟ المهم نزلت ورحت لبيتنا كان قريب وقبل ما ادخل الباب الرئيسي كان يطالعني ويكلمها واهي تكلمه وتطالعني المهم مدري شكان بينهم ودخلت وقلبي محترق ودي اعرف شبينهم؟؟ ودخلت وسلمت على أمي وطلبت مني أبدل ثيابي عشان أتغدا
بعد اسبوعين قربت الامتحانات وأنا كل همي والنسبة عشان أدخل الجامعة بيوم من الايام قعدت بداري وحبيت أسوي جو للدراسة ففتحت الستارة عشان اسمح للشمس تطل على الغرفة واعيش جو الدراسة وبديت أدرس...... بعد ثلث ساعة لاعت جبدي وحبيت أغير جو وأطل من الستارة وقعدت أشوف السيارات الرايحة والرادة فجأة طاحت عيني على احد مألوف علي يخزني من بعيد فخفت وصديت بس الفضول خلاني اشوفه ولم دققت عليه عرفت انه عامر اخو مشاعل وكان شكله عاجبني لكني خفت وسديت الدريشة وكملت الدراسة وكان بكل فترة يتردد ببالي:ليش يطالعني؟ شيبي مني؟ لهدرجة أنا هامته؟؟ وأتعوذ من ابليس واكمل الدراسة، بعد الدراسة تعبت ورحت أنام تعبانة وفي الصبح رحت المدرسة وبالتحديد بالفرصة حبيت أعرف شسالفت اخو مشاعل وشسالفتهم علي فقلت لها:
"مشاعل هذا اخوج الي امس عند الباب؟"
"أي وشرايج فيه مو مزيون؟؟"
قلت وانا مستحية "لاعادي مافيه شي؟؟"
"هههه لاتقصين علي رفيجتي واعرفج لا استحيتي"
"يوووووه شفيج قلت لج مافيني شي ولاعاجبني زين؟"
ورحت أغير الموضوع دون أعرف شي.......
ونفس الحكاية بالردة شفت الولد عارف حزة رجوعي للبيت وينطر عشان يشوفني وأنا اسوي نفسي مادريت عنه وأصد لبيتنا...
بعد فترة،،
عطلت وخلصت الفترة الاولى من السنة الدراسية واول يوم عطلة قالتلي مشاعل انها عازمتني ببيتها ولازم اكشخ عشان عازمة البنات فوافقت وكشخت ولبست بدلتي الوردية واذكر كان شكلي حلو وقتها..... رحت العزيمة وسولفنا واستانسنا ولم جا وقت العشا تعشينا وراحوا البنات ولم جيت بروح حلفت علي مشاعل اقعد شوي نحلي لاني كنت اعز اصدقائها وقعدنا ناكل الحلو بعد العشا وبعدها رحت أغسل إيدي بمغاسل الضيوف ..وأنا أغسل إيدي سمعت صوت باب رئيسي أحد دخل البيت ولم شفت بالمنظرة الا اخوها..هني أنا مت خرعة وقلبي دق أما اهو وقف منصدم يطالع المهم أنا سويت نفسي عادي ورحت للصالة ومالقيت مشاعل فحبيت انطرها على أعصابي .... فجأة سمعت :السلام عليكم...
ولم التفت الا عامر الي جا خفت مووووت وقلت
"وعليكم السلام"
عامر تجرأ وقعد بالكنبة الي يمي وقال
"انتي اخت راشد؟"
"إإي نعم"
"يحليلج تشبينه عاد أخوج مزيووووون"
"مشكور ......."
وكنت مرتبكة واذكر وقتها كان يخزني بشكل غريب يخوفني وأنا ما أعرف أتصرف شسوي اقوم ..ابقى؟؟
فقلت دون أستوعب :"انت شفيك؟؟تبي شي؟"
الولد فز وحس شيسوي وقال:" لا ولا شي"
"الصراحة انت موطبيعي من زمان تخزني وتضايقني ودي تقول شفيك فيني في شي؟"
" أتمنى ما أصدمج أنا أول ماشفتج هذاك اليوم ومادري شفيني وان كنت مضايقج والله ثم والله ماني مستوعب؟؟..يمكن يمكن مشبه عليك وسامحيني ..." وطلع مدري وين راح..
بعد دقيقتين ردت مشاعل وقعدت شوية لين رجعت البيت
الجزء الثاني:
كنت بالبيت محتارة دايم أفكر فيه ..معقولة كان يخزني مو مستوعب او يقوله عشان يمثل دور العاشق المحب؟؟ المهم بعد يومين قالتلي امي
"حنان يمج جهزي أغراضج بنروح المزرعة العطلة جت"
استانست وجهزت جنطتي ومرنا أبوي ورحنا .
وكان عامر رفيج راشد اخوي يزورون بعض بالدوانيية ...
ونزلنا المزرعة واستانست مع بنات عمي لدرجة انهم نسوني عامر والتفكير فيه وبعد 5 ايام بالمزرعة ولم كنت أتمشى مع بنت عمي شفت أخوي راشد يتكلم بالتلفون
"عامر تعال المزرعة والله وناسة شباب وسوالف.."
هني أنا شكيت انه عامر اخو مشاعل وقعدت أفكر شراح يصير؟بيقعد يخزني جدام أخوي؟؟
حنان..حنان شفيج سرحتي تعالي نكمل خنروح للبنات..
ورحت معاها وقعدنا يم الدوة وشربنا شاي حليب ولعبنا جنجفة حالنا كحال بنات كاشتات...
ملينا وقررنا نتمشى وحنا نمشي قالت وحدة من البنات
"بنات تكفون شرايكم نتمشى صوب الدوانية عادي يعني نسولف خنسوي جو ؟؟"
البنات اغلبهم وافقو وانا عادي بس خفت من عامر الله يسترررر
المهم فماحبيت يتكلمون ورحت وياهم، وحنا نمشي شفت راشد مع واحد من الربع طالعين فقال راشد
"يا بنات شفيكم روحوا بعيد شحقا جايين عند الدوانية؟"
أنا حاولت أرقع وقلت:
"راشد أمي تقول نجيب العشا؟؟"
"إي خل يجيبونه الصبيان"
ورحنا البنات وطلبت من امي نأجر بقيات ورضت بعد الحنة والرنة وكان بنفس الوقت الشباب ماأجرين بقيات...ولم وصلوا خذيت بقي ورحت مع بنت عمي بعيد يعني مغامرين وبنت عمي الله يهديها اسرعت ودعمت شجرة اهي الحمدلله مافيها شي لكن البقي كان عالق بالشجرة وماقدرت اطلعه فقلت اصبري شوي بنادي واحد من الشباب يساعدج... فرحت بظلمة ولقيت زول احد يلعب فصارخت تعالو ساعدوني ولم حس فيني قرب وطلع عامر الله يستررر
فقلت له السالفة وقال: انشاء الله انا أساعدكم
وراح يحاول وبكل فترة يطالعني لكني تجاهلته وسويت نفسي متأثرة بسالفة البقي
"بعدها قال بنات شرايكم نتسابق بالبقي ؟"
عاد بنت عمي استانست ووافقت وانا بعد وافقت ولم بدا الانطلاق مشت اهي ومشيت شوي وسمعته يقول "حنان لحظة لحظة"
قلت "؟؟؟؟؟آمر"
"حنان قسم بالله العظيم والله اني مستحي ومدري شقول بس حطيها ببالج صج اني يمكن لعوبي لكن احس لم اشوفج اتغير وتتغير شخصيتي فوق تحت مدري ليش احس اصير تكانة وانا احس انجذبت لج واتمنى ما تزعلين او تعصبين لانه مو بيدي مجرد شعور.."
انا هني أحس كأن أحد طاقني طراق مو مستوعبة ومادريت عن نفسي الا اني مشيت بالبقى الحق بنت عمي الي مدري وين وصلت،
بعدها رجعنا للبنات واذكر كنت اسرح لدرجة ان البنات لاحظوا فيني هالشي...
تبون تعرفون شعوري تجاه عامر؟؟؟
انا من قالي انه يخزني مو مستوعب حسيت انه صاج وانجذبت له وكله افكر فيه وبالوقت نفسه يجيني صراع نفسي يبعدني عنه..
وبالظبط مدري شكان الشعور مقدر اوصفه الله اعلم؟؟.......
بعد شهر....
رديت للمدرسة والله يعين عالدوامات
وبيوم من الايام ولم كنا أنا ومشاعل رادين مالقيت عامر ينطرني وانا متعودة انه ينطرني عند بابهم....
قلت يمكن ماقدر اليوم ...باجر نفسه ما طلع....الي عقبه ؟؟الولد طول عسا ماشر ليكون مل مني وحب يغير وماكان ينجذب لي شعقبه عقب ماخلاني انجذب له شوي شوي؟؟

فقررت أتاكد بنفسي وبيوم من الأيام ولم كان أخوي مو بغرفته خذيت تلفونه وخذيت رقم عامر وحبيت أدق عليه من جهازي مرة وأشوف ردة فعله هل فعلا لعوبي أو لأ؟؟ وكان على اني داقة بالغلط،......
"ألووو؟؟"
"ألو من معاي؟"
"مها موجودة؟"
"لا اختي غلطانة ولاتدقين مرة ثانية"
وسداه بوجهي...هني أنا استانست خلاص هذا حب شريف وماعنده غيري بس ليش ماينطرني الصبح؟؟
فجأة دق تلفون ولا اهو عامر فحبيت أرد من باب الفضول
"ألو نعم؟"
"اختي مشغولة"
"لا فاضية آمر بغيت شي؟؟"
"والله ضايق خلقي وودي أدردش وشوفي ترا استئذنت...شفتي الأدب؟؟"
ما استوعبت وسديت التلفون وقعدت أبجي بشكل مو طبيعي...
بعد فترة استوعبت وقلت بيني وبين نفسي ليش أبجي لهدرجةهامني؟؟؟ يوووووه يولي مادريت عنه (((هل كنت صادقة؟)))
وصار يدق.... يدق ومارديت ونمت .....
لم قعدت من النوم شفت مسج منه:
قال لوحبيت غيرك وش تقول
قلت احاول قد مااقدر امنعك
قال وان عيت تطاوعك الحلول
قلت احبه يابعد عمري معك

الجزء الثالث:

فكرت بنفسي ليش ما أكلمه؟؟ شنو بخسر خن أستمر معاه لين أعرف النهاية وأعرف منه يحب أولا ...
"مرحبا مشكور عالمسج الصراحة عجيب"
"هلا وغلا ...شلونج؟"
"تمام وانت شلونك"
"بخير دامج بخير من معاي؟"
"عذاري "
"عاشت الأسامي معاج عامر كلميني عن نفسج الصراحة انجذبت لج.."
"اسمي عذاري عمري 18 سنة طالبة بكلية التجاري..."
طبعا جذبت بسالفة التجاري....
وخذتنا السوالف وقلبي يحترق......
ومرت الأيام وعلى حالتنا هذي وحاولت أجذبه بكلامي وكان يموت فيني كله يدق ومسجات....
المهم بيوم من الأيام كان هذا حوارنا
"عامر انت عمرك حبيت أو انجذبت لوحدة من البنات؟"
"امم ماحبيت غيرج"
"لا حبك لي ادري بس معقوله قبلها كان قلبك فاضي؟؟"
"اقولج بلي خلقني جعلي ما أتوفق ان جذبت ماحبيت مو عشان زعلج بس هذي الحقيقة....؟؟ "
عيني دمعت وضااااااق خلقي ...معقوله ماكان يحبني؟؟ والي صار بالمزرعة؟؟؟ بالعزيمة....كله كلام فاضي خدعني فيه؟؟
"عامر أنا أخليك"
"بدري يالغلا..!! "
"لا تعبانة أخليك بنام"
وكحالي قعدت أبجي وطلعت بيت شعر عالسريع....

أثر الوفا مايملي شي فعيونك؟؟ حتى الجميل ترده اليوم نكران!
فعز الغلا تجفي وترحل بهونك؟ لاواحسافة منت لي يوم ندمان؟
ليتك تشوف الحال ضايع بدونك ليتك تحس شوي وتكون انسااان
حتى فبعدك يحرم اني أخونك؟؟ ذكرى حبيبن كنت به يوم ولهان
ذكرى وقلبي محتفظها لجنونك؟ لكن حسافة تطلع اليوم خواااان

وبعدها مانمت دقيت على مشاعل
"ألو منو؟؟"
"هلا مشاعل أدري ضايقتج بس تكفين والله مانمت ودي أسولف وياج"
"أممم زين دقيقة وأرد بغسل وجهي قعدتيني من النوم"
"لاخلاص اسفة والله مدري بااي"
"حنان خلاص ماراح يجيني نوم شوي وادق"
بعد خمس دقايق دقت...
"عسا ماشر شفيج خرعتيني؟"
"لا ولا شي حبيت أسولف وياج"
"صج فاضية"
"أدري"
وخذتنا السوالف وكان شي مهم قلناه...
""تعالي عامر اخوج لعوبي؟؟ صج"
"ههه توج تدرين هذا أكبر نصاب بالكويت الله يهديه"
"وماعمره حب يعني؟"
"نعم؟؟ وشكو لهدرجة هامج عامر؟؟"
"لا!! ولا شي بس حبيت أعرف لأن شكله مو مال حب"
"لا والله يحنان مدري عنه.. بس أتوقع مايحب "
وخذتنا السوالف لين نمت واهي ردت تنام...
وبيوم دقيت على عامر وكان هذا الحوار....
"الصراحة أنا ما أجذب عليك أنا حبيت قبلك واحد وأموت عليييه لكن طلع خوان وتركته"
"حتى أنا.."
"انت شنو؟؟"
"لا ! ولا شي .. ولا شي"
"عامر ان ماصارحتني ما أكلمك لاني ماحب انعدام الصراحة بيننا"
"الصراحة يبنت الأجواد نفس قصتج بس مو عاد بالضبط أنا حبيت بنت جيراننا فترة وكنت معجب فيها حيل ولكن شي خلاني ابتعد عنها والحمد لله ابتعدت عنها بإيدج"
"وشنو اهو الشي؟"
"لا يبنت انتي وشلج بالهسوالف ماعلينا انتي وشلونج؟"
"الا وتقولي ولا أزعل؟؟"
"يوووه يحبج للفضول.... الله يسلمج سمعت عنها سوالف من وحدة لم كنا بالمزرعة وانها راعية سوالف؟؟"
"ومنو الي طلعت الكلام يعني ؟؟"
"والله مدري يبنت ماعرفها لانها مو مزرعة أهلي كنت زايرهم عشان رفيجي والله "
انصدمت وكانت صدمتين لي:
كره البنت القريبة مني لي!!!
وكره عامر لي لسبب غير واقعي؟؟؟
فقلت بصوت متأثر
" ليش وشفي البنت عليها؟"
"انتي شفيج لهدرجة هامج الموضووووع؟؟؟؟ يبا خلاص البنت ونسيتها!!" المهم أنا تغيرت نفسيتي وضاااقت الدنيا فيني شسوي شيفكني من عامر والتفكير فيه؟؟ واكتشفت مع الأيام ومن خلال المكالمات والمحاولات اني حبيته دون أدري عن نفسي وليتني ماحبيته هالولد خلاني أنجذب له وراح عني الله يسامحه....
دخلت قلبي يالغلا دون لأدري
وعشت عمري دون أعرف اني أهواك
عشتك صغير وكنت عالحب بدري
طفلن وعقله دايم الدوم وياك
خفت العشق يتعب بهالوقت عمري
خفت العمر بيضيع لوماتجافاك
حبك لقيته داخل العرق يسري
برغم عني يالغلا شفت مثواك

[دوووم رايقه]

الجزء الرابع:
حبيت أقطع المكالمات معاه ....وكان يتصل دايماً لين كسرت خطي وشريت خط جديد وهني انتهت قصت عذاري وعامر...
بيوم من الأيام لم كنت رادة من المدرسة بالباص لقيت عامر بيدخل بيتهم وشافني معصب وحاقد وأنا مومستوعبة أطالعه ودي والله أصارخ وأقول :تكفا يعامر والله مظلومة لاتصدق العذال ترا حبييييييييتك غصب عني "
لكن ماباليد حيله..... نفسيتي تعبت وماقعدت آكل ولا أكلم أحد مدري شفيني كل هذا على عامر كرهت الحب وسميته عذااااااااااااب ان كان أحد الطرفين مظلوم...
اذكر بيوم من الأيام قالتلي مشاعل بالفرصة:
"حنان أخوي عامر قال ابتعدي عن حنان وانهاراعية سوالف.
بس لا تخافين زفيته وقلتله تكفى من قالك وانت شدراك قال: وحدة من اهلها قالت....قلت شوف حنان اقرب من هالقريبة لي واعرفها بنت مؤدبة ماتطالع كله راسها تحت تسألني عنها بعدين ان بعض الظن اثم ولا تسمع كلام ناس الا لم تتأكد... سامحني ماقدر أستغني عن حنان.... واقتنع شكله الحمدلله"
استااااااانست كأن الروح ردت فيني مرة ثانية والله ماتتصورون
سعادتي أحس الله عطاني هدية بعد حالتي الي تبجي الصخر...
ورد ينطرني عامر عند الردة بالباص... وبيوم من الأيام دق تلفون البيت
"ألو.."
"ألو قوة حنان عرفتيني؟"
"منو؟"
"عامر أخو رفيجتج مشاعل"
"هلا عامر تبي راشد"
"لا حبيت أقولج شغله وأتمنى ماتفهميني غلط تكفين واخاف احد يشوفج دقي من تلفونج صدقيني مهمه وقولي عامر ماقال وبعدها لا ادق ولا تدقين؟"

خفت وقلت
"عامر شبيني وبينك؟ ليش ماتقولها هني او مشاعل تقولي؟"
"لااااء مشاعل لااا السالفة اكبر من جذي صدقيني والله اوعدج بعدها ماراح ادق واذا دقيت علمي اهلج؟؟"
ترردت لكني دقيت بعدها من جهازي عشان محد يشوفني
"آمر يعامر؟؟"
"حنان أنا أدري اني جرحتج بعدما عرفتي السالفة من مشاعل واني ظلمتج دون أتأكد وأدري والله اني غلطت بحقج وترا شي طبيعي ان كل انسان يسمع كلام عن طرف يحبه يبتعد منه وهذا الشي انتي تسوينه اذا سمعتي عني كلام...وسامحيني واوعدج مرة ثانية أتأكد
وبصارحج: بيوم من الأيام دق علي رقم غريب بنت أول مرة سديته بوجهها وعصبت لكن بعدها حبيت أنساج وربي حبيت أنساج منها وحسيت اني تأقلمت معاها بعدها راحت عني ولاأدري عنها وخلاص افتكيت منها ومستانس الحمدلله.... حنان وربي حبيتج واطلبي الي تبينه لو عيوني عشان تسامحيني على الغلط.. تكفين يحنان ....
"عامر ورب الكعبة ماتدري شصار فيني نفسيتي تغييييييرت تخيل!!!! ماقعدت آكل ضعفت ... كان ودي لم حقدت علي بالباص أصارخ وأبوح الي فقلبي عشان تتأكد اني مو من هالفئة من البنات لكن تحملت وكتمته بقلبي واحس ارتحت بعد ماقلتلك ومهما صار ما أزعل عليك لأنه صح ماسويت الا انك ابتعدت عن شي طبيعي الناس ينفرون منه....الحمدلله ربي نصرني وطلع الحق...
عامروالي خلقني حبيتك دون لأدري مع الأيام وترا الحب مو بيدي والله يعين الله يخليك لي يارب"
"امييييييين ....... حنان أناوعدتج ولازم أوفي بوعدي واذا هالشي يضايقج نستمر بالتلفون ولأننا نعرف بعض خلاص بقطع المكالمات عالنقال وعشان أثبلتلج اني مو قاعد ألعب عليج... وإذا حابة نستمر مسجات ماعندي مانع"
استانست وحسيت الهموم راحت بفضل الله واذكر وقتها سجدت سجدة شكر لله ... واستمرت علاقتنا نظرات من الباص وسلام ومسجات لين نهاية رابعة ثنوي وتخرجت والحمدلله كانت نسبتي زينة تدخلي الجامعة3.40 وكنت أحاول بمشاعل تشد حيلها عشان تكون معاي والحمدلله جابت نسبة عالحفة الي تدخلها للجامعة...
وطبعا عامر خف يشوفني لأني ارد للبيت مع ابوي المهم واحس خفت علاقتنا تكنا وضحكت على الأيام الي فاتت معاه صج مراهقة ولعب جهال....وتخيلوا ما أشوفه نسيييييييييييته وكان مسافر يدرس ومرت سنين وبيوم من الأيام بثانية جامع أنا ومشاعل كنا ننطر أهلنا يمرونا بعد الدوام فدق جهاز مشاعل وقعدت تتكلم خمس دقايق ولم سدته قالت
"يحليل عامر بيمرني اليوم ابوي مشغول"
"يحلييييييله حمدلله على سلامته قديم حده مغبر"
وقعدنا نضحك
ولم وصل احس كني فزيت دون لأدري مدري شصار فيني ؟؟مو توة قبل دقيقة أضحك مو هامني شلي قلبني بهالسرعة؟؟؟
تغير مو عامر الي اعرفه كبر شوووي وكان ينطر اخته لابس نظاره شمسيه... حسيت ان العبرة خنقتني وحنيت له حيييل كأن ايام المراهقة ردت لي تمطر من جديد...

كنت أتوقع حب الأطفال بيموت...
لين اكتشفت انه لهلحين مامات..
الحب الأول ينحيي فوسط تابوت
يحي ويبقى حافظن كل مافات...

كنت أتمنى اني ماشفته ولا تذكرته ولا أجرب حبه مرة ثانية؟؟
متى أكبر وأنساه خلااااص عيب علي قريب أتزوج!!

حاولت أبتعد عن مشاعل بكل الطرق عشان
ما اشوفه واهو مارها وانساه
يمكن اقدر أبتعد عنها .... لكن عن التفكير فيه ياليتني قدرت!!

الجزء الخامس:
بيوم من الايام دق علي أبوي بالجامعة وانه مايقدر يجي يمرني ولازم أتصرف.....فتذكرت موقف أيام الثانوية..حبيت أكرره:
"مشاعل مستحية منج"
"آمري"
"تذكرين قبل سنتين لم كنتي بسيارتكم تغازلين؟؟ منو وقتنا وصلنا"
"والله مذكر يكثر ماغازلت؟؟"
ماقدرت أقط نغزات فقلتها سيده:
:يوووه الله يهديج ...أنا ودي تقطوني على بيتنا بطريجكم لاهنتي؟؟"
"أفا عليج تعالي الحين عامر بيمرني"
أنا هني تحسفت والله لوراده بيتنا برجولي أحسن!!
المهم استحيت أرد وأقول هونت وانجبرت أروح معاهم..
لم وصل عامر وركبت بالكشن الي ورا ظهر عامر عشان ما شوفه ولايشوفني..
سلمت ورد السلام مو مستوعب اني حنان لانه ماله خلق شكله متملل..
قبل لانحرك قالت مشاعل
"عامر لاهنت قط حنان عالبيت أول"
"حـــنـــان!!!! "
"إي حنان ليش؟؟"
عامر لف دون يستوعب (قبل مانحرك طبعا )
"حنان شخباري ..... شلونج شخباااارج؟ قدييييمه
وكانت نظراته تسحرني كلها شووق ووحشة
أنا استحيت
"تمام الحمدلله عالسلامة"
"الله يسلمج يارب"
*-بالطريج بعد ماحركنا
الكل ساكت هدوء وكانت مشاعل متملله تقرق على عامر واهو يجامل بس إي إي مادرى عنها
وأنا سرحااانه أفكر بالموقف الي توه وأعيد اتذكره
فجأة سمعت صوت صحاني من التفكير ...
أغنية ((وحشتني سواليفك.....وحشت شوفتك أكثر..)) لراشد الماجد
كان يعدل المنظره ويشوفني مبتسم وكأنه يقول تراها لج أهداااااء..
تعرفون الحاله لم تب تنزل دمعتكم من الخنقه وانتم تمسكونها لاااااء لاتفضحيني يادمعة ومنتم قادرين؟؟ أنا كنت جذيييه؟
وصلنا وخذيت كشكولي ونزلت
حتى نسيت أقول يعطيكم العاافية؟؟
دخلت وماتغديت وصعدت بداري متضاااايقة ومشتاقه ودي أعبر عن شوووقي لعامر ودي أفضح شعوري وأصارخ بأعلى صوووت
لكن أشياء وااااجد منعتني من هالشي...
بعد اسبوعين:
كنا بالجامعة أنا ومشاعل نسولف وكانت مشاعل تنطر أحد يمرها
ومرها واحد ما أعرفه كان ملتزم وملتحي قلت يمكن واحد من اهلها؟
وكنت أتضايق ودي الي مرها عامر؟
وبيوم الثاني مرها نفس الرجال؟؟
ومرت مدة على الحاله..
حنيت على عامر وحبيت أسأل مشاعل بطريقه غير مباشرة:
"من هذا الي مرج أول مرة أشوفه"
"منو عامر؟"
"لا واحد متدين أي عامر؟؟"
" إي عامر مدين ليش؟؟"
ضحكت؟؟ وطقيتها مزاح
"يلاا عاد منو هذا؟؟"
"إي والله عامر رفيجه توفى وتدين الله يثبته"
يناااااااااااس والله الحين أكتب ومشاعري مكتوووبه غيير مقدر أقوولكم شعوري شكان؟؟
ماكان لي وقتها شعور مصدومة شلون تجي المشاعر وانا مو مستوعبة
معقوله عاااااااامر تدين لا مو معقوله؟ وأنا من أحب ؟ أحس نصي الثاني راااااح ؟؟الحب انكسر.. نص راح ونص الثاني وهمومة فيني.. دنيتي توقفت لدقيقة كأنها سنة .. عامر الي حبيته وصارت له مواقف معاي بينساني؟؟
"حنان ....حناان"
"ها لا ولا شي الله يهديه"
حمدت ربي ما بجيت لأن الصدمة أحيانا تخلي الواحدما يبجي لين يستوعبها ...وماظنتي بستوعب..
بعد ربع ساعة وصل أبوي وركبت السياره
كنت ساكتة أفكر بكل شي لاتسئلوني بالضبط عن شنو بكل شي عن عامر والمواقف وسالفة انه تدين كل شي مر ببالي
"حنان يبوج وشفيج ساكته ماتكلمين"
"لا يبا تعبانة من الدوام شووي"
"الله يعينج أول ماتردين تغدي ونامي "
"انشاء الله"
رديت البيت مصدوووومة
بالغدا كنت أكل وسمعت الاذان فتذكرت عامر وخنقتني العبرة وقمت
"الحمدلله"
راشد قال
"حنان شفيج قمتي؟؟ ماكليتي شي؟"
قلت ومدري عني الا ودمعتي نازلة:
"الحمدلله شبعت"
ورحت امشي بسرعة
ولم دخلت قعدت ابجي بصوت عالي فجأة دخل راشد وأمي علي خايفين وبسرعة مشيت دمعتي
"لو سمحتم روحو ماني فاضية"
راشد:"حنان شفيج تبجين افا ترى دموعج مو رخيصة قوليلنا والله بنساعدج"
قعدت أبجي مرة ثانية"
الجزء السادس:
قربت أمي مني ولمتني ..
"حنان شفيج وربي لتقوليلي ترا مقدر أنام الا وعرف شفيج ترا مو عادي اشوفج باجية واسكت انتي بنتي ترا"
لميت امي بقوة وبجيت حييييييييييييل
"والله ييما ولا شي بس دكتورتي ظالمتني كل البنات درجاتهم حلوة الا أنا معطتني D وانا تعرفيني أدرس؟؟"
"وبس على هذا تبجين خرعتيني؟؟ ولا يهمج باجر انا وراشد عندها ونكلمها وشتبين بعد؟؟"
"ها.. لا يما ليش تتعبين أنا بكلمها ولا تتعبين وبعدين أهي حليوة بتسمعني"
المهم امي حاولت حاولت لين أقنعتها...
أنا ماكنت شاعرة ولا لي بالشعر علاقة بس كتبت وقتها شي يخفف عني الضيق
عامر ترا عمري بدونك خساره عامر ترا قلبي فبعدك يعاني
عامر غدا يرحل بـِــحُرْ اختياره متدينن يبغى ذبونه تفاااني
أرضيت ربك وابتعدت بإصارة وأرعبتني مابين قسو الزماني
ليتك تشوف الحال بعدك توارى ليتك تشوف الحزن كيف لبساني
قلبي غــدا فبعدك بليــا إنااااره متظلمن يبغى حبيبن لفاني
وعقلي بدا يتعب كحال السكارى يصعب عليه الفكر لينه شقاني
وقلبي بدا يلهب كلهب الزقارة محتاجلك يمه غدالك أناني
وأنا البنا وانت معاااي الحجارة يكيف ببقى دون ساس المباني؟
وأرجوك تسمعني وذي اخر عباره والله أعشقك فوق كل المعاني

والله أحــــــــبــــــــك يــــعـــــــــامــــــــر
الله ياالزمن شلون بصارحه؟ اذا شفته هل بيشوفني ؟؟ بيشغل اغنية وحشتني سواليفك؟؟ يناس وربي أحبه وامووت فيه وأحب الأرض الي يمشي فيها لو يطلب عيوني فدوته له ويحرم علي غيرك يعامر لو اخر لحظة بحياتي محد أشوفه غيرك..
أعوذ بالله من ابليس الولد تدين وأنا بالغت كأني مابيله الخير يويلي من الله..
مانمت وبطلت الدريشة اطل يمكن أشوفه رد من المسجد
بعد شوووي
شفته راد من سيارته وانا قلبي يرقع اتشفق أشوووفه
لم نزل شفت شكله كااااااااااامل بحاول أوصفه لكم
الولد دشداشته قصرت
ملتحي ووجهه سمح
وشماغه على طريقه شيوخ الدين
أنا أدري انه عامر بس مو مستوعبه ومو مصدقه بعد(مدري شلون)
عزاه قبل عامر يطل من تحت عشان يشوفني والحين أنا أشوفه
قبل أصد عنه وأكمل دراستي الحين اهو يصد ويروح
والله لو أكتب كتاب كامل بشعوري تجاهه الكتاب خلص ألف نسخة ومشاعري ما بدت أصلا...
أنا أدري ان التدين أحسن له والله يوفقه امييييييييييييييييييييييييييييين
لكن كل الي قلته شعور الصدمة ولأني حبيته حسيت انه طاااار مني
تمنيت اني انتقل من بيتنا أهاجر عشان ما اشوفه ولا اتذكره
حبيته وما حبيت أبتعد عنه ويروح والمشكلة يمنا يعني غصب عني بشوفه وما أفضح نفسي
كل ما يأذن أتذكره واتعوذ من ابليس واقوم أصلي
بيوم من الأيام بالجامعة دقيت على أبوي وقلت له برد مع مشاعل وأدري مصختها بس كيفي بشوف ردت فعل عامر وتمنيت هالشي
ولم ركبت السياره
عامر كان مرتبك لا لف ولا قال شلونج حنان من زمان مو شايفج لج وحشة ....اعووووذ بالله من هالواسواس الله يبعده عني
المهم بالسياره كانت سرعة عامر مبالغ فيها مرتبك وقالت مشاعل
"عامر شفيك تركد"

[دوووم رايقه]

المهم وصلنا ووصلوني ببيتنا ولم مشاعل نزلت عامر بيصفط السياره عدل رحت له مو مستوعبه!!!!
الجرأة من وييين جتني؟؟ صج ما أستحي الله يغفرلي امييييين
"عامر أدري انك تحبني أدري يعامر والله مهما صار وترا الحب حلال اذا مافيه فسق وفجور مايهمني شي بس أبيك ماتنساني؟؟"
"استغفر الله يابنت انسيني أنا اعتدلت والله يغفر ذوبي كلها الي قبل يارب الله يهديج يبنت وعودي لربج ترا مالنا غيره"
تحرك ولف
بجيت جدامه
تكفا دقيقة اسمعني والله اتمنى لك الخير وتتدين وأكثر بس الي قاهرني انك بتنساني تكفا عشاني لاتنسيك الايام فيني والله يثبتك يعامر تراني أحبك"
رحت وكانت نظراته متضايق وحسيت انه يحبني الحين خلاص الي يبيه عادي اهم شي يحبني ...
بيوم من الأيام كنت قاعدة افكر واستوعبت اني غلطت بحق عامر واني بتعاقب على الي اسويه ؟؟ الولد مدين باجر بيوم الحساب يشتكي مني عند ربنا سبحانه؟؟ لا لازم أبتعد عنه وادعي ربي..
طبعا كنت أقص على عمري عبالي نسيته ولا أصلا ماعندي شي افكر فيه غيره..
فكرت ليش إذا مايحبني ما يخطبني؟؟
نطرت شووي يمكن يجي مع الأيام يطق بابنا ويطلب إيدي
مرت أيام
أشهر
ماشفت شي؟؟
لاااااااااااعت جبدي مليت والله مليت شهالعيشة ترا الدنيا مو واقفة على عامر لازم أغير عيشتي ومالقيت الا اني اوافق على أي واحد يخطبني (كان واجد يخطبوني لكني كنت أرفضهم عشان عامر)
المهم بيوم من الأيام خطبني واحد ولد حلال خوش واحد ووافقت متضايقة..
أمي استغربت واستانست وانا قلبي محترق حيييييييييل يليت يكون عامر مكانه لكن شسوي قضاء الله وقدره


الفصل السابع:
العرس بعد سبع شهور بالضبط ويوميا اروح ويا أمي للسوق نشتري تجهيز العرس واشوف عامر داخل للبيت وأخزه بشكل مو طبيعي
قرب العرس وليته بدل مايقرب يبعد...استغفر الله
قبل عرسي بشويه اسابيع عزمتني مشاعل وجيت بيتهم
"حنان والله مدري شسوي ان تزوجتي صج بفقدج يااااو صج انج غالية"
مر عامر وللأسف ماسمع شي شكله كان بيصعد
حقدت وودي يسمع "أي والله انا بعد بفقدج لاتزوجت ولاتنسين ترقصين بعرسي وتصورين وياي "
واهو يمشي كان الباب يعكس شكل عامر أشوفه صاعد فجأة وقف عامر وطاح ؟؟
" عااامر "
مشاعل: " شفيه عامر؟؟؟!!!"
"تعالي عامرطاح مدري شفيه خنشوفه"
استدعينا طبيب لان ماكان عندنا احد يوصله للطبيب..
لم جا الطبيب كشف عليه وطلع برا الغرفة
مشاعل:"ها دكتور شفي أخوي؟؟"
"لاءة مفيش حاجة بس ارهاق وقل نوم شكلو مابياكلش؟؟ طب لييه؟"
"مدري يدكتور؟؟ والله ماشوفه الا بليل راد للبيت "
طلع الدكتور وقالت مشاعل
"حنان تكفين خليج عند الباب دقيقة على ما أجيب ماي تحت وسامحيني على طيحة عامر والله مو وقتها"
"لا والله عادي روحي وتطمني انا ناطرتج"
لم طلعت مشاعل كان عامر سامع كل شي
بطل عيونه وقال:" بتتزوجين؟"
"عامر ارتاح الحين مشاعل بتجيب ماي مالك شر"
عصب "قوليلي بتتزوجين ها؟؟"
دون ما استوعب ونسيت انه مريض ولازم اراعي حالته
"إي بتزوج عندك مانع توك تجيني كان خطبتني اذا كنت تحبني؟"
طلعت نازلة بالدرح والا مشاعل قبالي مصدومة
"شفيج حنان؟؟"
"لا ولا شي بس عامر قال أناديج وأنا أخليج يلاا باي"
طلعت مستااااااااااانسة طلعت الي بجبدي ونفس الوقت مخنوووقه

بعد اسبوع تقريبا كان يوم الجحيم أقصد العرس
طبعا الكل مستانس الا أنا أتعس وحدة ؟؟الناس تستانس عشاني وأنا متضايقة ماظنتي أحد مثل حالتي الا قليل لكن شسوي الله يعين...
بعد العرس ردينا أنا والمعرس (حمد) بالليموزين وقعد يتكلم معاي
"حنان ماخذيتج الا عارفينكم من طرف أمي وأوعدج ماراح أقصر معاج وأي شي تبينه لا يردج الا لسانج"
ارتحت لكلامه وشكله حليووو وخوش واحد مايستاهلني والله
مرت ايام وأنا أحاول أتأقلم معاه وأحبه لكني ماقدرت معنه كان ولا أطيب لكني ما قدرت أرتاح معاه ..
كان ينطر مني مبادرة حلوة .. كلمة حلوة لكن مالقى؟
كنت بطبيعتي ما أسوي شي الا إذا استوعبت أو نبهني ..
بيوم من الأيام طلعني نتعشى ونروح السينما الصراحة ماكنت مستانسة حيل مثل قبل كنت أموت بشي اسمه سينما وراعيت شعور حمد وجاملت لدرجة اني اسولف بالسيارة سوالف مالها معنى...
بعدها مرينا البحر نتمشى
"حنان تحبيني؟"
"ها؟؟ أكيد زوجي ولازم أحبك"
"شلون أتأكد؟"
"تبي أثبت لك؟"
"إي اثبتي لي؟"
سويت نفسي الزوجة المضحية وحطيت رجولي عالبحر ورحت بعيد يعني بنتحر..
"تبيني أنتحر عشانك"
"يلاا سويها"
"لهدرجة مو هامتك!!"
"لا هامتني بس عارف انج تمثلين منتي مسويتها ..الصراحة ماحسيت انج تحبيني ولا سويتي شي من خاطرج وإذا قلتلج الصراحة هذي... وانا زوجج ولازم أقول الي بخاطري"
انصدمت وحسيت اني مقصرة بحقة وشذبنه؟؟
"حمد والله أحبك وانت زوجي ولو ما أحبك ليش أتزوجك لان شكثرقبلك خطبوني وماوافقت الا عليك"

[دوووم رايقه]

بعد اسبوع...
"حمد ممكن طلب؟"
"آمري تدللي يعيون حمد"
"ممكن توديني لبيت أهلي مشتااقة لهم؟؟ "
"أفا عليج ان ماوديتج من أودي تجهزي وانا ربع ساعة أوديج"
لم كنا بالسيارة..
"حمد افتح الأف أم.."
واهو يدور بالموجات لمحت اغنية (وحشتني سواليفك)
"حمد حمد الله احلى اغنية خل عليها"
قعدت اسمعها وأتذكر الموقف القديم لم عامر أهداها لي... خنقتني العبرة كنت أتمنى عامر يكون يمي يسوق اتمنى يرجع اليوم هذاك ولكن للأسف كان جدامي سيارات وراي سيارات والوضع غييير بس الشي الوحيد الي يوحي بهذا اليوم الاغنية فحطيت بالي معاها وكان حمد يسولف وانا سرحانه ما كنت أسمعه...
وصلت وسلمت على أمي
"الحمدلله عالسلامة هلا وغلا ببنيتي شلونج شخبااارج؟ عساج مرتاحة بزواجج؟"
"الحمدلله تمام بشوفتج انت شخبارج شعلومج؟؟ والله مشتاااقتلج حيييييييييل"
"وأنا بعد مشتاقة سلميلي على حمد لاتنسين"
"يوصل انشاء الله"
قعدت مع أهلي أسولف لين العشا بعدها دقيت على حمد يمرني..
الفصل الثامن:
لم دقيت عليه قال انه بيروح المخيم واحسن اني انام بيت أهلي..
المهم نمت بيت أهلي وباليوم الثاني طلبت أمي أساعدها عالعشا لأن أخوي عازم ربعه بالدوانية ورحنا المطبخ لم خلصنا الطباخ عطينا صحون العيش لراشد عن طريق الملحق الي يطل عالدوانية
بعد ما خلص الشباب العشا وصل راشد الصحون لنا وانا آخذهم لابسة ملفعي لقيت عامر يغسل إدينه بمغاسل الضيوف لكن ماشافني
رجعت للمطبخ نغسل المواعين وفكرت اني أشوف عامر بطريقه مايشك احد فيها .. رحت عند الثلاجة الي اهي يم الباب علبو أدخل شي بالثلاجة و بعد ثانية شفت عامر من بعيييييد ما شوف ملامحه بس زوله قاعد يضحك ويسولف ..... حنيت لعامر ولضحكته هذي من قلب وقعدت أخزه بعدها استوعبت وصكيت الثلاجة..
وحنا طالعين من المطبخ حسيت بدواخ ؟!!
آآآآآآآآآه ..
"حنان حنان شفيج يمج؟؟"
"يما انا وين شصار؟؟"
"لايمج مافيج شي قومي الظاهر دختي بس"
قعدتني على الكرسي وراحت تنادي راشد لكن راشد كان بالحمام فطلع عامر
"هلا خاله تبين شي؟؟"
"يمك وين راشد"
"خاله راشد بالحمام اطلبي تراني مثل ولدج"
"يويلي اجل راشد بيطول اخاف وحنان تعبانة؟؟ تقدر توديني لأقرب طبيب ؟؟"
"ابشري خل تلبس عباتها وانا ناطركم بالسيارة"
وحنا بالسيارة كنت تعبانة مو مستوعبة وأطالع عامر جدام يسووق .
وصلنا ودخلت عند الدكتور وسوالي تحاليل ومدري شنو طلع شوي يكلم امي وعامر...
بعد دقيقة رجعت أمي وعامر امي كانت مبتسمه
"مبرووك ألف مبروك انتي حامل يحنان"
"حامل؟ من صجج "
طالعت عامربخووووف وبدون ما استوعب بجيت...
أمي " حنان شفيج منتي مستانسة؟؟"
"بلاا يما بس مستانسة من الفرحة"
عامر ماقال ولاكلمة كان منصدم ومايتحرك وبعدها طلع مدري وين راح..
دقت أمي على زوجي وطلبت يجي فقرر يجيني بيتنا لانه بيتأخر بيرد من المخيم
بعد ساعة ونص وحنا بالبيت جا حمد وكان طااااير من الفرحة
"مبروك الف مبروك يقلبي اطلبي الي تبينه"
"تسلم والله ابي سلامتك "
"مستحيل تكونين ببيتكم تعالي بيتنا بيت زوجج "
"انشاء الله "
ولبست عباتي ورحنا للبيت

[دوووم رايقه]

بعد اسبوع زارتني مشاعل:
"هلا مشاعل شلونج شخبارج؟؟"
"تمام مبروك الف مبروك عالحمالة الله يوفقج ويسهل عليج"
"الله يبارك فيج تفضلي.."
وحنا قاعدين كانت مشاعل سرحانة ومتغيرة...
"مشاعل شفيج مو مشاعل الي اعرفها؟؟"
"ولا شي بس متضايقة عامر الايام متغير مو المدين اللي نعرفه صاير يعصب على أي شي ويطلع من البيت ويطول ماشوفه واجد يمكن مرتين اشوفه بالاسبوع؟؟"
ضاق خلقي وتضايقت على عامر..
"الله يعينه يمكن ظروف وانتي حاولي تتقربين منه يمكن محتاج مساعدة وتكفين طمنيني"
بعد 9 شهور ولدت الحمدلله وجبت ولد سميته فهد وقررت أقضي النفاس بيت أهلي لأنها أول ولادة
كان ولدي مزيووون يشبه حمد زوجي المهم زاروني بنات من ايام الثانوية والجامعة وكنت مستانسة نفسيتي متغيرة للأحسن..
بيوم الأيام ولدي تعب شوووي فقررت أوديه للطبيب وأمي قالتلي ماله شر كل الجهال جذي لكني خفت وأصريت أروح وطلبت من راشد أخوي يوديني الطبيب ورحنا والطبيب زفني قالي مافيه شي الولد بس عطاني علاج بسيط ورديت للبيت أول ماصفطنا لقيت موقف غريب صدمني !!!!!!!!!!!
لقيت عامر بيدخل بيتهم مطول دشداشته حالق لحيته ومعاه زقارة وكان شكله تعبان مأيس من الدنياا
"راشد هذا عامر المدين؟؟"
"إي الله يهديه الولد مهوب الأول تغير وماعاد يجينا بالدوانية ومحد يجيه صار مكرووه"
ضااااااق خلقي ومسكت اعصابي لا أنفضح وسويت نفسي عاااااادي ولاهامني
الله ياالدنيا عامر انقلب وخرب كل هذا مني الله يسااامحني يارب لاتعاقبني والله موذنبي أحس كرهت نفسيييييي
شافني عامر وقعد يخزني ولم نزلت تباطئت يعني مشغولة بولدي اشيله مع الدوا ولم دخل راشد البيت قررت أكلم عامر أعرف شسالفة أحاول أرده لا أتوثم...
كنت أرجف...خايفة .... مادري شكان شعوري وقتها؟؟ وكان فهودي ولدي بيدي شايلته
"حنان زين الي سويته؟؟ قلبتي حالتي فوق تحت غيرتي نفسيتي محد يحب يقعد معاي الناس كرهتني وأنا أكرههم اكثركنت أحبج وحتى وأنا مدين أفكر فيج واتعوذ بالله من ابليس كانت دنيتي فاضية عقلي فاضي بس انتي فيه ...من تزوجتي هالتافه وأنا كرهت دنيتي كرهت العالم والحيييييين بس انتي وزقارتي هي دنيتي"
دمعتي نزلت ومادري شقووووول؟؟
"ليش ماتزوجتني يعني لو كنت تحبني نطرتك نطرتك عطيتك فرصة و تبين لي انك مافكرت فيني وتزوجت غيرك لو كنت تحبني وانت مدين كان خطبتني لأن الحب حلااال"
"كنت بتزوجج بعد ما أكمل دراستي بالخارج بس الله يهدييييييج تسرعتي ولا عطيتيني فرصة وأنا كنت أدرس برة عشان تقبلين
فيني لانج كنتي شاطرة وأنا ماعندي شهادة فدرست عشانج واخر شي تصدميني والله ما توقعت لكن خلااااص"

[دوووم رايقه]

الفصل التاسع:
طالعته نظرة ندم وعيوني تتغارق..
"عامر إذا صج تحبني ماتقدر تثبت الا انك تنساني لاني متزوجة وعلى ذمه رجال وعندي ولد واذا صعب عليك تزوج وصدقني راح تنساني مثل ما ((((نسيتك))))) كنت أقولها من ورااااااا قلبي نسيتك
ورحت بيتنا وتحسفت حيييل ليتني ما استعجلت أكبر غلطة بعمري هذي صج كنت جاهل وقتها لو ما تزوجت كان عامر الحين زوجي
لكن خلاص لافات الفوت ماينفع الصوت ومالي غير زوجي وولدي الله يخليهم لي ...
دخلت داري وقعدت كعادتي أبجي وكنت اطالع ولدي يمي عزااااااااه قبل أبجي بروحي والحين ولدي يمي أحس كبرت ومايصلح فحاولت أمسح دموعي وأتكن شووي...
كنت ودي أتخلص من حمد وأكون يم عامر ..لكن هل عامر بيرضى بعد ما جرحته؟؟ والأهم شذنب ولدي وزوجي وشبيقولون الناس عني لا مستحيييل مستحيل مالي غير زوجي وولدي ....
وعااامر؟؟ عامر!! الله يوفقه ويعيني خلاص القدر منكتب لي جذي...
مرت أيام وخلص النفاس ولازم أرجع بيت زوجي وجهزت اغراضي ووصلني راشد للبيت..
انا وصلت الساعة 11 بليل تعبانة وقطيت ملفعي وناديت الخدامة تاخذ فهودي وقعدت على الكنبة أرتاح ..وقعدت أفكر بعامر أفكر بخطأي له أفكرو أتذكر كل شي ببينا صار..
بعدها قمت أفتح التلفزيون فجأة
آآآآآآآآآآآآآآآه!!!!!
لقيت حمد طايح عالأرض !! بشكل غريب
"حمد...حمد.. رد علي أنا حنان زوجتك رجعت لك وولدك رجع بعد تكفى حمد ؟؟؟"
بسم الله حمد مايرد شفيه شصار الله يستر؟؟
خفت ودقيت عالشرطة
"تكفون الحقو علي ماعندي أحد وزوجي طايح مدري شفيه؟؟"
بعد شووي الشرطة حولت الاسعاف علي ووصلت
أنا دخلتهم وقعدت أنطر على أعصابي...
قرب مني رجال وكان متأثر ..
"البقية بحياتج "
"لاااااء !!!!!!!!!!!!!!!!
مستحيل تتغشمر صح؟؟ أكيد تتغشمر؟"
تأثر الرجال وطلب الاسعاف تنقل الجثة...
يناس كان شعور غريب وصدمة بالنسبة لي ،صج ماحبيته بس حسيت اني ضعت ومالي احد بالوجود لانه بالاول وبالاخير زوجي يعني مالي غيره ...
اذكر اني كنت منهاره واصارخ بشكل غير طبيعي وانا اشوفهم ينقلون جثة حمد للاسعاف، بعد فترة جتني الخدامة معاها ولدي وبدون ما استوعب صارخت "روحي عني فاضية انتي ؟؟"
لكن شنسوي بقضاء الله وقدره؟؟

[دوووم رايقه]

بعد سنة،،،
بعد أيام العدة عشت مع ولدي عندي أهلي على طول وكانت الشرطة مستمرة على التحقيق بموتة زوجي حمد مرات تسالني ولا أهله ولا ربعه وجذيه..
بيوم من الأيام زارتني مشاعل وقعدنا نسولف
"باركيلي حنان أنا ملجت"
"؟؟؟من صجج !!!"
"إي والله على ولد خالتي"
"مبروووك الف مبروك الله يهنيج ويوفقج يمشاعل"
"الله يبارك فيج وانتي اول المدعوين لا تنسين"
"لاماراح أجي اسفة"
"أفااااء ليش؟؟"
"من صجج خبلة انتي اكيد اني راح اجي.... إذا ماجيت بعرسج اجل اجي عرس منو؟؟ "
ومرت أيام وأيام وجا يوم العرس فلبست وكشخت وأذكركان شكلي حلو امي مدحتني لدرجة اني استحيت،،،،
بالعرس كان العرس عجيب وأذكر كنت قايمة بالعرس لأنه عرس أعز صديقاتي ،،
لم دخلت العروس قالو ان أخو العروس راح يدخل معاها وكان عامر نفسه مع مشاعل داخلين ومثل مانعرف قرايب العروس ورفيجاتها يعدلون فستان العروس عشان تقدر تمشي وانا قمت بهالشي وكنت لابسة شيلتي وعباتي وكان عامر مو مستوعب ان الي تقوم بهالشي اهي انا كان يمشي مستحي مع اخته ومبتسم ،واذكر اني نسيت نفسي والعرس واعدل الفستان وبس اطالع ابتسامته المعروفه فيه خصوصا بموقف الجامعة لم كان يطالع المنظرة ويشوفني ،،،،
اهو حس ان وحدة تشوفه فلم طالعني استوعب منو انا وانصدم!!!
وقعد يخزني مبتسم لفترة وراها استوعب وكمل المشي مع اخته .
اذكر اني نسيت الخلاف بيننا وكان الي هامني عامرواني احبه هذا اهم شي وكنا نتبادل النظرات ناسين الناس
بعد ماطلع عامر من الصالة وقمنا نصور مع العروس أذكر كنت مرتاحة نفسياً ومبتسمة بشكل مو طبيعي مع الناس ،بعد مارجعت البيت كان عندي طاقة شعور مو طبيعية فحبيت أسترجع ذكرياتي مع عامر..لم كان يطالعني بالباص ..ويوم اعترف لي بشعوره بالمزرعة..ولم كنت مع مشاعل ومعاه بالسياره واهم يوصلوني البيت... أيام عمري ماعشت نفسها ولاظني بعيشها فاحسن لي احتفظ فيها بذاكرتي ...وراها حبيت أطل من الدريشة يمكن أعيد أيام المراهقة مع اني كنت ناقده على حركاتي بس غصب عني والله، قعدت انطرحوالي ثلث ساعة وما شفته وقررت أنام بعد ما قلت بيني وبين نفسي الحمدلله والشكر صج جاهل روحي جابلي ولدج أونامي واقتنعت بيني وبين نفسي ان هذا خبال ولازم أكبر عقلي وجيت أسك الستارة الا عامر جاي من العرس شكله تعبان بعد يوم طويل ففزيت ونسيت الكلام الي بيني وبين نفسي وصرت أطالعه بدون استوعب واهو كان يتمغط من التعب فرفع راسه وشافني .
انا جيت أدني اروح لايشوفني ولا ألقاه يبتسم ويمشي داخل البيت.
الحركة الي سواها حسيت فيها ان عامر كبر وصار رجال فاهم مو انه يخز ويأشر يقول باي حسيت فيها انه تكانه ويحبني عن طريق الابتسامه واهو يمشي وهذا خلاني احبه زياده..
بعد اسبوع اتصلت علي مشاعل وكان حوارنا الأهم:
"حنان شرايج بعامر أخوي؟؟"
ارتبكت وقلت " !!عامر؟؟!! اا خوش واحد "
"أنا مدري شقولج عامرأخوي صدمنا وقال انه بيسوي خير ويتزوجج لانج قريبة لنا وتحتاجين أحد يحرص عليج وولدج فأهلي مايقدرون يعارضونه وانا حبيت آخذ رايج؟"
انصدمت وكنت مو مصدقة عامر نفسه يخطبني بعد ما أخطيت بحقه؟؟ مستحيل أكيد اني لم الحين ضمن أيامي السوده وهذا من أحد أحلامي ...؟ وقلت لها:
"من صجج ولا تتغشمرين؟"
"ليش أتغشمر والزواج فيه غشمرة أجل؟؟"
"استحيت وقلت: مدري شقول لج؟؟"
"أهاا شكلج موافقة سكوتج معناته موافقتج خلاص أخلي أبوي وعامر يخطبونج على يوم"
"هييييه لا لا من صجج؟؟"
"ليش مو موافقة؟؟"
"لا لا خلاص مدري..مدري؟؟"

[دوووم رايقه]

الفصل العاشر
ضحكت ضحكة نقدت على نفسي منها ووراها سكرنا التفون...
بعد يومين:
عامر مع أبوه زارونا وطلبو إيدي من أبوي وراشد أخوي..
وأذكر كنت مستانسة وأشوفهم من فوق الدرج...فجأة لقيت أبوي صاعد فرحت أركض وقالي وشكله فيه ضحكة علي
" حنان يبوج أنتي موافقة ولا لا ترا الراي الاول والاخير لج؟"
نزلت راسي مدري شقول وقلت
"يبا براحتك والي تشوفه"
بعدها حسيت ان شكلي غلط جدامه فمشيت اكمل لين صعدت فوق...
((الفترة الي عشتها قبل زواجي من عامر كانت ضمن أحلى أيام عمري وحسيت اني قمت أعوض السنين المرة ألي طافت وحسيت انها رحمة من رب العالمين...
بعد فترة صار يوم العرس
بالعرس حسيت اني عروس حرة ...عروس متزوجة برضاها..تمشي بثقة ماتحاتي وهي بمشيتها المستقبل بس تفكر بالحاضر وتخلي المستقبل للمجهول الي اهي راضيه فيه..
الصراحة أقولها لكم رغم اني أحب عامر وماحبيت بعمري غيره الا اني حنيت لزوجي حمد وحسيت اني غلطت بحقه كثير وطلبت الله يغفر لي ويرحمه ومهما يكون يظل بقلبي ومستحيل انساه لأنه مهما صار فهو اول زوج و ابو ولدي..
وكنت مخليه ولدي فهد عند أهلي الأيام الأولى بس ووراها يعيش عندنا أنا وعامر..
بالفندق:
كان عامر يطالعني بنظرات تسحرني وتجذبني وكنت مستحية ومتردده....مسك إيدي وراها قلت له
"سامحني يعامرعلى.....
حط إيده على شفتي وقال
"حنان هذا أول يوم لنا وأتمنى انج تسكين هالموضوع وتفكرين بالحاضر والمستقبل بس ويكفي اني أحبج ومثل ما تعرفين ان الي
يحب عمره ما يحقد على طول ..... فترة يعصب ووراها تلقينه عند قلب حبيبه وانا ادري انج قبل ماتغلطين تحبيني ومستحيل تتعمدين الغلط الا اذا كان غصب عنج عشان هذا انا تجاهلته وخطبتج وأتمنى انا نبدي صفحة جديده"
دمعت عيني من كلامه وحسيت انه يحبني كثر ما اني احبه ...
بعد أيام
كانت الأيام مع عامر من أحلى الايام وهذا طبعا بعد مارجع لي فهد ولدي ...وعامر كان يلعب مع ولدي فهد وماحسيت فيه أي حقد تجاه ولدي بالعكس كان يعامله مثل ولده وهذا الي ريح قلبي أكثر..
بيوم من الأيام دق التفون ورحت أشيله وطلعت المباحث طلبتني عشان التحقيقات بسبب موت زوجي حمد فوافقت اني اجيهم بس بعد مايرجع زوجي عامر..
وأول مارجع عامر البيت قلتله السالفه ووقتها كنت منصدمه لأن عامر كان معصب ومتوتر ...أنا قلت أكيد مايبيني أروح بروحي فقلت لايعامر بتروح وياي انت وقال:
"ان رحتي ماتلومين الا نفسج وانتي عاد تفهمين..."
طاحت دمعتي وانصدمت ؟؟عامر يكلمني بالاسلوب شغيره ؟شصار فيه؟؟ لا أكيد هذا مو عامر...
عامر شاف دمعتي وأنا أمسحها فحن قلبه وضمني وشكله متضايق وحسيت بعيونه بكلااااااااام مخبيه عني بعدها قام عامربغرفته بدون أي كلمه..
خفت وقلت لازم أروح له ولمن دخلت شفته يبجي وشكله يكسر الخاطر.... حسيت بشعور غريب واني بوضع مادري سببه؟؟
فقعدت جنبه وقلت:"عامر إذا يضايقك روحتي انا ماني رايحه والله عشانك بس لو تجي الشرطة بس أكيد في سبب؟؟
"حنان إذا لي غلات عندج لاتروحين واذا تحبين نفسج وولدج فهد ابقي هني ...وراها راح ينام ...
سكتت ومدري شقول وخفت أكلمه يعصب علي فقلت بنفسي خل ينام ويريح وانا اشوف التلفزيون واذا قعد يمكن يرتاح ويقول السبب...

[دوووم رايقه]

وانا اشوف التلفزيون دق التلفون ولا اهي المباحث
"فقت لهم ان زوجي مايرضى خلوها يوم ثاني"
عصب الرجال وقال "وليش زوجج مايرضى بلله؟؟"
"مدري الظاهر كان معصب وتعبان مدري شسالفته باجر يرتاح وانا اجيكم"
"أهاا!! أوكي ممكن رقم زوجج؟؟"
"أوكي...." وعطيتهم رقمه
بعد نص ساعة قام عامر من النوم وقلتله بللي صار ..
قرب عامر مني ونظراته غيظ وعصبية وأذكر انه مد إيده علي
وقال "ليش؟؟؟ليش؟؟مو قايلج لاتكلمينهم؟؟؟"
اخترعت وقلت:"ليش شفيها انت قلت لاتروحين مو تكلمين ...يهون عليك انك تمد إيدك يعامر والله ما توقعتها منك بس الله يردها لك يارب وخذيت ولدي فهد للدار معصبة....
سمعت صوت الباب وكان صوت عامر طلع دون ما يتاسف ولا يحس بالندم ........!!!
يومين بالضبط مادري عن عامر وينه شصار عليه ولا أهو اتصل فيني ولا أنا اتصلت فيه.........
باليوم الثالث سمعت صوت الباب فدق قلبي وركضت صوب الباب وطلع عامر شكله تعبان مو نايم ولا ماكل شي ..
مع اني أحبه وحنيت له الا اني ماحبيت أنزل نفسي عنده فطالعته بنظرة حقد ...واهو نزل راسه شكله نادم وقال
"حنان أنا آسف وماكان قصدي"
"تمد إيدك وبس آسف .. يعامر الي سويته مو هين ويليت اني غلطت عشان احس بالذنب لكن ماسويت ولا شي؟؟"
"انتي ماتدرين بالسبب أنا ماكنت مستوعب بلي أسويه ولو أقولج السبب يمكن راح تعذريني الا أكيد بتعذريني وتجين انتي تتأسفين"
"استغربت من كلامه وقلت"شنو السبب بلله؟؟"
مسك إيدي وقعدنا بالكراسي وقال " يحنان انتي تدرين اني حبيتج من زمان والي يحب ينسى عقله ويسوي أي شي بس عشان يبقى مع حبيبه."
"وشكو هالكلام من السالفة؟؟"
"انتي لم تزوجتي حمد أنا كرهت نفسي وكرهت الناس كلهم وشفتيني مرة كان شكلي تعبان ومتغير بعد ما تدينت وجيت كلمتج"
"إي صح ؟؟"
"أنا سويت شي......"
"شسويت"
"سويت شي عشان أظمنج لي بس"
قلت " ؟؟؟؟؟؟؟لايكون الي فبالي ؟؟"وكنت معصبة
"إي يحنان فهمتيه..؟؟"
"انك قتلت حمد؟؟"
عرق عامر خايف وقال "إي بس وربي كنت تعبان مو مستوعب وكنت بذاك اليوم مو ماكل ولا شايف أحد اعبر له وربي يحنان لأني حبيتج وكنت أشوف ان الي أحبها وكل عقلي يفكر فيها مع واحد ثاني ويوميا وأنا الي حبيتج بروحي ماقدرت استوعب وقتلته مو حقد لكن كنت مو مستوعب وفكرت اني بهالطريقة راح أضمنج لي بس لو فكرت انها راح تفرقنا صدقيني ماسويتها....وانتي فكري لو تشوفيني أتزوج غيرج شنو تكون ردة فعلج؟؟"
"لا مستحيل.... ؟؟؟؟؟بس يعامر مهما يكون فللي سويته غلط وكان عقلك فيك يعني مو مثلا والعياذ بالله شارب نسكت عنها ونعذرك وان الي سويته قتل مو انك تتهاوش معاه او أي شي ثاني؟؟"
"تدرين ان هالجريمه يدري عنها أحد غيرج؟"
"منو!!!!!!!!!!!!!!!!؟"
ضحك ضحكة غريبة وقال "الشرطة"
"لاااااااااااااااااء قول والله احلف يعامر؟؟؟ يعني خلاص الحين بتروح عني..؟؟"
"مو قايلج اذا لي معزة عندج لاتقوليلهم ولا بتخسريني؟؟"
"مادري كان قلتلي السبب"
"خلاص يحنان أنا أعترف اني غلطان والحين عقلي فيني وأستحق العقاب لان مهما كان فحمد ماله ذنب...واذا فبالج اني متضايق على

[دوووم رايقه]

الفصل الحادي عشر
نفسي حشا بالله مومضايقني ومكدر خاطري الا اني بفارقج وماراح أشوفج بعد ماتهنيت فيج"
بجيت جدامه بشكل مو طبيعي وأحس انها أخر نظرات معاه وأحس انه كان ساكت منصدم مايدري شيسوي......
عامر قام وراح باتجاه الباب بيطلع.....
"عامر وين رايح؟؟"
"حنان الشرطة تحت تنطرني بس طلبت اني أكلمج شووي وأتأسف لج بعد مامديت إيدي عليج"
صكت فيني كل الدنيا وحسيت ان الامور تمر بعقلي بسرعة
"لا يعامر لا اتروح تكفا لاتروح وتخليني ورحت أشده بعيد عن الباب وقال"حنان شسوي هذا امر الله والشرطة أقوى منا يعني مستحيل أنحاش والشرطة عند الباب ..."
دمعت عيني وملامحي تغيرت..وقال
"حنان ولو آخر كلمة فبيتنا أتمنى تحطينها فبالج ...دير بالج على نفسج واعرفي اني أحبج وأموت فيج ولاتنسيني اذا صج لي معزة عندج......"
وطلع دون لا أنطق بكلمة لأني كنت مصدومة وبعد ماراح استوعبت ورحت أركض ألحقه وأول مافتحت الباب الا عامر بسيارة الشرطة منزل راسه متضايق والسيارة حركت؟...
شسوي منو اقول له السالفة فرحت مع فهد ولدي لبيت أهلي وقلت لهم السالفة وكانواهلي منصدمين من عامر لأنه ماكانو يدرون اني بعلاقة سابقة مع عامر وشخلاه يذبح حمد فحسيت بكرههم له الا امي كانت تواسيني وحاسة فيني لأنها أقرب الناس لي..
بثاني يوم عرفت ان عامر عقوبته اهي الاعدام ...
اول ماسمعت الخبر انهرت وأغمى علي فأخذتني أمي للمستشفى ونمت يومين وأذكر انه اليوم هذا من كثر ماهو أسود علي أفضل أعيش كل السنين الي عانيتها ولا أشوف اليوم هذا..
أول ماطلعت من المستشفى طلبت من أمي أزور عامر فرفضت الا اني أصريت أروح وأذكر انه اول يوم أعاند أمي لكنها وافقت وفهمت ظروفي...
وصلت للمكان وطلبت مقابلة عامر وأول ماشفته كان ملتحي شوي مومحلق ومتضايق وكان يقرا قرآن........
"ها عامر شلونك؟؟"
نزل راسه منصدم ومتضايق من زيارتي...
"هلا حنان انا بخير شلونج وشلون فهد؟؟ عسى متضايقين"
"لا مرتاحين مع أهلي "
ودي اني أقوله وأفاتحه بسالفة الاعدام لكن خفت أضايقه وخليتها بيني وبين نفسي وخليتها زيارة تخفف عنه مو تكدر عليه بآخر أيامه وخصوصا اني أحبه فحبيت أنهي علاقتنا مثل مابديناها مع بعض بحب وابتسامه...
"حنان أنا أحس اني مرتاح ورجعت لرب العالمين مثل أول ويارب يغفر لي وانتي ادعيلي "وابتسم لي براحة ايمانية
حسيت اني استانست بعودته لله عكس قبل تماما
"الله يثبتك يعامر وربي كلنا ندعي لك "
احس انه متضايق ومايبي يبين لي الضيقة وانا بعد واحس ان فينا كلام لكن صعب نقوله جدام بعض لدرجة انا نطالع بعض ماندري شنقول وبالوقت نفسه ماودنا نروح عن بعض
"حنان أنا أحبج وبوصيج بشي"
"آمر يعامر؟؟"
"إذا تحبيني صج ابيج تتزوجين غيري بعد وفاتي.."
"مستحييييييييل مستحيل لو أموت ما أسويها"
"ولو أنا أموت وأبي واحد يحافظ عليج مع فهد وينسيج الحزن ويغير دنيتج بعدي وصدقيني بتحبينه اكثر من حبج لي"
"من صجك أحب غيرك والله لو شنو ما يدق قلبي لغيرك.."
"حنان مو مشكلة لاتحبينه بس أبي واحد عالاقل يسولف معاج يتفاعل معاج لاني ادري شبيصير فيج بعد وفاتي بتنسين حقوق نفسج وولدج فلازم انج تنسين وتصيرين قوية يحنان انا افكر صح يحنان؟؟وانتي بس بمشاعرج وهذا اكبر غلط لان احياة اكبر من هالشي "
ودي أبجي لكني تظاهرت بالقوة وكانت نظراتي حزن وأحبس الضيقة بقلبي وانا مبتسمه"
"الي تشوفه يعامر بس صدقني اني ماراح أنساك..."
أذكر انا لمدة طويلة نطالع بعض نظرات دون مانقول شي وودنا نعبر لكن مسكنا أعصابنا ......
"عامر أنا تأخرت ولازم أروح مع السلامة "
دمعت عينه وكان يضغط على أصابعه ومشيت فعلاً وأول ماالتفت ورا شفته وحسيت ان الي اشوفه عامر محد بيفهمني كان الي حبيته أروح عنه بآخر نظرة بيني وبينه فركضت نحوه وضميته وكلنا نبجي بقوة لين جا الحارس وطلب اني اغادر لان الوقت انتهى....فقال عامر حنان هذي الرسالة اتمنى انج ماتفتحينها الا بعد موتي .......

[دوووم رايقه]

رجعت البيت ومامر فبالي لاشي غير عامر وكنت متضايقة واعصابي مرتفعة ومادري شسوي عشان أريح نفسي كل شي كان جدامي صعب.............
كرهت نفسي كرهت الكل حسيت ان الي بيموت انا مو عامر والايام تمر كأنها سنين ......
تاريخ15-7 كان يوم الاعدام وكان اهلي وأهله بيحضرون الاعدام وأنا منهم وأذكر ان وزني قل بهالفترة وملامحي تغيرت وصرت مو حنان الي الكل تعود عليها ،وبيوم الاعدام لبست أي حجاب وأي عباية ماهتميت بشكلهم مثل قبل كشخة أو تصلح للمكان ولم جيت الساحة لقيت ناس متجمعين وشفت بعيد مكان مرتفع للاعدام فقررنا انا نوقف مع الناس واذكر اني ماكنت ارد على أي أحد من أي يمي..........فبعد عشر دقايق شفت رجال ماسكينه وإيده مقيدينها وكان يدور بين الناس على أحد وعرفت انه يدور على بيشوفني ولكني ماحبيت يشوفني حبيت ينهي حياته مو متضايق وأذكر انهم علقو حبل برقبته وواقف على شي مثل الكرسي الصغير وكنت أصيح الا ان امي لمتني وحاولت تهديني
اول ما أبعدو عنه الكرسي طحت وأغمى علي.........
بعد ماصحيت من الاغماء
وقفت ماهتميت بحالتي ..... تعبانه او شي
رحت أدور وين عامر؟؟ يمين المكان ...او يسار؟؟؟
لين ثبت المكان....... لكن للاسف لقيت عامر مغطى وجهه وشايلينه رجال بعد ماتوفى.............
******************
صبرت على عامر يترك الحب ويتدين ويبتعد عني قلت يمكن يخطبني وابقى معه.......
صبرت على عامر يوم حسبته يكلم غيري وخوان قلت يمكن يحبني بتاكد.........
صبرت عى زواجي بحمد قلت يمكن يصير مستحيل واكون مع عامر........
لـــــــــكــــــــن ؟؟
هـــل بــقـــدر أصـــبـــر وأهـــو مـــيـــت؟؟

[دوووم رايقه]

وكانت الرسالة الي أهدانياها عامر بالسجن قصيده كتبها لي

بتبع طريـق الـهجر ياعـمري اليوم *وأمشي بدربن يحتويني لحالي
مقسى طريجن صار دربي على الدوم*بمشيه انا ياناس طول الليالي
أمشي بدونك ياالغــلا حولــي ســهوم*عزااه يومنــك فـخوفـي قبالي
بنهيك أنا من صفحة العمر مــلزوم*ملزوم رغم ان الهجر ماصفالي
أكتب شعورن داخل اقلب مكتـووم*وألقى ظلوعي ترجف فبعد غالي
مظلوم أنا ياناس والله مــظــلــوم*ياويل حالي كان طيفــه طـرااالي
يعين ربي ياالغلا ذاك مــقــســوم*برضى نصيبي وكل ماهو جرالي


فكتبت رسالة باحد من الايام بعد وفاته
بكتب شعورن بالحشا محتويني**يومن ورا يومن همومي تزيده
عن صدمتن مرت بمر السنيني**مير البلا هالقلب دومــن يــعيده
كنت أكتم اجرح العميق فعيوني**والناس تحسب من عيوني سعيده
وأشوف حالي صعب محدن يعوني*والهم مده ساكــنــن وسط قيده
من صاحبن كد راح عيا يــبــيني*وأشوف خطواته لدروبن بــعــيده
والله حتى الــنــوم عـيا يجــيــني*وأصبحت دونه للهقــااوي شريده
ودي أعبر عل حــالــي يــهوني*بس المصيبة حال مــحدن يجيــده
وأقول تكفون ياعرب له خـذوني*بحس قربه لــوهـي إيدي بــإيـــده
ماهمني عاذل ولا من نــسووني*لوهي جــمعتنا بــيوم دنــيا جديده
كنت أتحلم مــيــر مــا من عويني*حــنا نـريد وللزمن مــا يــريـده


الـــــنــــهايه
بسم الله الرحمن الرحيم.....والصلاة والسلام على أشرف خلق الله محمد صلى الله عليه وسلم،،،
في الحقيقة الرواية عبارة عن مزيج من الخيال ومن الواقع ولا أنكر أنني كتبتها جراء خيالي لكن ثمة شي لن أخفيه عنكم....
بعض من أحداث القصة وهو حدث رئيسي قد عشته وعانيته في الواقع فحبيت أن أكتب قصة تحتوي هذا الموقف إضافة إلى بعض الإضافات وإذا لاحظتم أن القصة تحتوي على تعابير واحساسات فذلك غير متعمد لأنني كتبته دون قصد بل شعوري الحقيقي المتأثر من الموقف هو من يكتب هذه الكلمات........
وأعتذر عن عدم تحديد الموقف لخصوصيته
تحياتي الخالصة من القلب للقلب وشاكرة لكم القراءة متمنية أن تحوز على رضاكم
الكاتبه: صــمـــت الــوداع


اتمنى من كل قلبي انها تعجبكم وساعدوا على انتشارها

[مساعد]

الللللللللللللللله واكبرررررررررررررر حدهااااااا طويييييله القصه


مشكووووووووره وجاري القراءه جزء جزء كل يوم جزء :)


الله يعطيج العافيه

[دوووم رايقه]

الله يعافيك اخذ راحتك وابيك تعطيني ردك بكل جزء تقراه بلييز عشان تزيد مشاركاتك خخخخ

[َفٍرٍآَقٍِـ گ مٍَـآ َقٍِوٍيًتِهُـ]

والله يادووم رايقه اني قريتهااا كلهااا حييييييييل عجيبه

وكسرت خاطري حنان حييييييييل والله مسكينه << حدي تأثرت معااهاا

يعطيييييييش الف عافيه

و الكاتبه مبدعه ما شاء الله عليهااا

عساش عالقوووووووه

[دوووم رايقه]

مـــــــاشــــــــــــــــــاءالله عليج


عساس عالقوه وماانحرم من وصالس يابعد جبدي والله


ويسلموووووووووووووش على المرور

[دوووم رايقه]

وبانتظار ردودكم يا باقي الاعضاء

[miSs pink]

سلموووووووووووووووو

وراح اتقل القصة لمنتدى ثاني


شكلها حلوه

[دوووم رايقه]

يسلموووووووووووووووو بنكو واتمنى انج تكونين قاريتها ويعطيج العافيه ويعطيه العافيه اي احد ينشرها

[ابو نورة العازمي]

جاري القراءه واتمنى تعجبني